was gits nöis?

04.11.2024 | scho es chehrli häär

Nöi Filiale in Grenchen

Sit em 24.10.2024 isch üsi nöi Filiale in Gränche am Bahnhpf Süd offe.
Ä isch es cho und go, trotz au däm ladet dr Bahnhof zum blibe i. Sigs im schöne Café zum Zmörgele oder Zmittagässe oder a sunnig u warme Täg uf dr grosszügige Terrasse unger de Ahorm Böim wo Schatte spände bi Glacé u chüehle Getränk. Auso, nächscht Haut Gränche!

lueg ine
13.09.2024 | scho es chehrli häär

Digitali Chundechartä ufm Handy

Nöii dörfe mir die digitali Chundechartä ufem Handy i üsne Verchoufsfiliale begrüessä. Äs isch e witere Schritt i die digitali Zuekunft. Für aui geignet wo ds viu Chärtli im Portemonnaie hei oder eifach gärn aues ufem Handy hei. Äs isch ganz eifach i 3min ersteut u direkt isatzfähig. Säubverständlech cha die physischi Chundechartä witerhin verwändet wärde. Us Auternative cha me sis Guethabe kurzerhand uf die digitali Chundechartä übertragä. Üsi Verchoufstalänt i de Filiale gäbe öich gärn Uskunft u häufe öich vor Ort witer.

Kundenkarte
02.09.2024 | Neu

mit Liebi zum Handwärk

Es brucht jedes für das das riesige Rad dräit u mir jede Tag uf`s nöie wunderbari Sache chöi produziere.
Mir hei ganz viu Häng wo bi üs schaffe wome gar nid so gseht oder si wahrnimmt – die huufe Häng si aber genau so wichtig u tragend wie die Häng wo Tag täglich vorne ar Front schtö u üsne Chunde es lächle probiere z entlocke.
So zum Bispiu üsi Florischtin, wo üs immer zum Saisonwächsu nöi u wunbderschöni Gschteck und Dekoratione für uf Tische ide Café, Kasseberiich, LadeDekoration, Büro,Ufenthautsrüüm u no viune Orte meh häre zouberet.
Säubschtverständlich wird ö dört nüt em Zuefau überla, saisonau-farblich abgstimmt zur ensprächende JahresZyt entstoh wunderbar schöni Sache wo sich üsi Chunde aber o mir üs immer wider dran erfröie!

20.08.2024 | scho es chehrli häär

so schliesst sich dr Kreislouf

Mir häufe o da mit, dass sich dr Kreislouf wider schliesst. Sit em ne Momäntli wärde üsi bruchte Nespresso Kapsle wider abhout, wider oder witer verwärtet zu Aluminium, Biogas und Dünger.

Mir wei dran blibe u versuche wo ou immer mir chöi mit guetem Bispiu vorab z ga.
Üses Land bietet ä Riichtum a Rohstoff wo mir dankbar chöi witerverarbeite zu beschte Produkt – jede Tag aber soviu das äs Sinn macht.

do luege mir druf
01.08.2024 | Neu

Mönu-Schale

100% biologisch abboubari Schale u Sigufolie. Äs isch die erschti Bio-Basierti Verpackigslösig mit Barriere für längere Hautbarkeit.

Für üs spiut ds Produkt u sini eigens kreierti Verpackung e massgebendi Roue. Nur wenn beidi i ihrer Art u Wis stimmig sie, chöi mir vou u ganz hinger üsne Produkt stah – u das wei mir ou! Üsi nöie Mönü-Schale si us schnäu nachwachsende Rohstoffe (d’Schale isch us Zuckerrohrfasere, die süsch nid verwändet wärde), si biologisch abboubar u klimaschonend, si tiefkühl-, mikrowäue- u backofetouglich. Sie garantiere ou ä Läbensmittuechtheit. Sie si auso beschtens geignet für üsi Mönü, wo mir täglich früsch u ohni künschtlechi Zusatzstoff u Gschmacksverstärker zuebereite.

Mir si stolz druf, dass mir zämä mit Naturesse https://www.naturesse.com/ ä nachhautigi Lösig für üsi tägliche Mönü-Schale gfundä hei.

do luege mir druf
09.07.2024 | scho es chehrli häär

Härzlichi Gratulation!

z Deby, üsi Lehrnendi het erfougriich ihri Abschlussprüfige zur Konditorin-Confiseurin abgschlosse, u das mit dr Abschlussnotä 5.1 BRAVO!
Näbscht dr praktische Prüefig, wo si ihres Können u d Lideschaft zu däm wunderbare Handwärch het chönne zeige, het si o ide schriftliche Prüefige bewiese, dass sis druf het.
Mir gratuliere am Deby für di bestandene Prüefige und wünsche ihre viu Fröid mit däm erlente Handwärch.

30.04.2024 | scho es chehrli häär

Hafermiuch

Äs isch bi üs scho es Momäntli es Thema gsi, doch hei mir für üs u üsi Asprüch für d Chunde anes feins Kafe, ke zfridesteuendi Lösig gfunngä.
Zäme mit üsne Verchoufsmitarbeiter*inne hei mir tüftlet, degustiert u probiert. O für üsi feine Speziaukafe wie es Chai Latte oder latte Macchiato mit oder ohni Aroma, es muess verha, entweder ganz oder gar nid.
D Afordrige si klar gsi;  si muess sich liecht la schüüme, dr Schuum söt de ä Momänt häbe nid z vergässe Gschmack und Ufwand.
Und jetz isches sowit -i üsne Café finget dir jetz Hafermiuchgetränk

zum Mitnä
18.10.2023 | scho es chehrli häär

Website

Es isch e Chrampf gsi u es het mängs uf und ab gä & zwüachine heimer nid gwüsst, wie mir üsi Vorstellige wo mir vorem innere Oug hei gha söue Usdrücke. Wie aber i anderne Beriche ou, gäbe mir nid so schnäu uf!
Jedes einzelne Produkt hei mir unger d Lupe gno, se is beschte Liecht & Szene gsetzt, nöi Foto gmacht u se lo würke wie si si, ganz ohni schnigg schnagg – üsi Lideschaft zu de Produkt u zu däm wo mir jede Tag mache gäge use z trage. D Filiale u Café träte jetz säubstbewusst und häu gäge use. Nid z vergässe üsi Houptdarsteuer – ohni die löift nüt! Si berchöme d Ufmerksamkeit wo si verdiene u mir danke ihne wo mitmache vo Härze – üsi Mitarbieter*inne!

Danke wöi mir ou em Team von Neofluxe, Biel https://www.neofluxe.com/portfolio/baeckerei-burkhard/ für die geili Umsetzig vo üsne Gedanke, Wünsch und Vorstellige!

 

Cafés
30.04.2024 | scho es chehrli häär

Müntschi ufem Dach

sit im Summer 2021 schteit üses Müntschi ufem Dach, u mir si stouz druf wie Nachbars Lumpi – wüu wär cha scho bhoupte är heig es 200 kg Müntschi ufem Dach het?
Das Müntschi beschteit us Polyester wie bim Bootsbou. Zersch wird aber z Schoggi-Teili us Kunschtstoff gformt u när mit Glasfasere u Polyester überzoge, aschliessend wird gspachtlet u gschliffe äbe genau wie wenn me es Böötli bout.
Nachdäm s d Form het gha, isch für d Folieimitation es grüscht us Maschedraht drum cho u o das isch us Glasfasere u Polyester – aschliessend wird agmale u laggiert, damit wie`s originau dä schon glanz berchunnt.
Für das mes de nach dr Härschteuig o guet het chönne abtransportiere, het dr André Gutknecht vo BONVALET`s Kunstatelier vor sim Atelier ungerem ne Dächli meh aus es Jahr mit chli Ungerbrüch dran gschaffet.
Aus Vorlag füre André diene 3D Modäu, Zeichnige u i üsem Fau vili vili Müntschi 😉 D Heruseforderig sig haut äbe scho d Grössi aber är het o scho ganzi Outo oder ä Elefant i läbesgrössi aus Chinderspiuzplatz gmacht.

Vile Dank André für das sagehafte Kunschtwärch wo mie jetz ufen Dach hei.