was gits nöis?

z ChütterSöili für e bessere Gschmack & zarters Fleisch

Überau wo bis üs d Müglichkeit besteit, setzte mir z Fleisch vom ChütterSöili i.
Das aromatische & zarte Felsich sowie dr höch Teierwoustandart het üs überszügt.

Z ChütterSöili darf nunme uf Burehöf ghaute wärde, wo die stränge IP Suisse Richtlinie erfüue, z Tier profitiert vo viu Platz u Ligeflächine. Das Söili muess sich aber si Name zersch verdiene -sim Fuetter wird e Mischig vo ganz spezialle & natürliche Chrütter zuegmischt – dür die spezielli füetterig wird z fleisch zarter, gsünger und aromatischer aus härkommlichs Söilifleisch.

Ob Schnitzu, Cordon-bleu, Schinke oder Brate – bi üs isch fasch überau ChrütterSöili drin.

mit Liebi zum Handwärk

Es brucht jedes für das das riesige Rad dräit u mir jede Tag uf`s nöie wunderbari Sache chöi produziere.
Mir hei ganz viu Häng wo bi üs schaffe wome gar nid so gseht oder si wahrnimmt – die huufe Häng si aber genau so wichtig u tragend wie die Häng wo Tag täglich vorne ar Front schtö u üsne Chunde es lächle probiere z entlocke.
So zum Bispiu üsi Florischtin, wo üs immer zum Saisonwächsu nöi u wunbderschöni Gschteck und Dekoratione für uf Tische ide Café, Kasseberiich, LadeDekoration, Büro,Ufenthautsrüüm u no viune Orte meh häre zouberet.
Säubschtverständlich wird ö dört nüt em Zuefau überla, saisonau-farblich abgstimmt zur ensprächende JahresZyt entstoh wunderbar schöni Sache wo sich üsi Chunde aber o mir üs immer wider dran erfröie!

Müntschi ufem Dach

sit im Summer 2021 schteit üses Müntschi ufem Dach, u mir si stouz druf wie Nachbars Lumpi – wüu wär cha scho bhoupte är heig es 200 kg Müntschi ufem Dach het?
Das Müntschi beschteit us Polyester wie bim Bootsbou. Zersch wird aber z Schoggi-Teili us Kunschtstoff gformt u när mit Glasfasere u Polyester überzoge, aschliessend wird gspachtlet u gschliffe äbe genau wie wenn me es Böötli bout.
Nachdäm s d Form het gha, isch für d Folieimitation es grüscht us Maschedraht drum cho u o das isch us Glasfasere u Polyester – aschliessend wird agmale u laggiert, damit wie`s originau dä schon glanz berchunnt.
Für das mes de nach dr Härschteuig o guet het chönne abtransportiere, het dr André Gutknecht vo BONVALET`s Kunstatelier vor sim Atelier ungerem ne Dächli meh aus es Jahr mit chli Ungerbrüch dran gschaffet.
Aus Vorlag füre André diene 3D Modäu, Zeichnige u i üsem Fau vili vili Müntschi 😉 D Heruseforderig sig haut äbe scho d Grössi aber är het o scho ganzi Outo oder ä Elefant i läbesgrössi aus Chinderspiuzplatz gmacht.

Vile Dank André für das sagehafte Kunschtwärch wo mie jetz ufen Dach hei.