Houzofä

jede Tag ufs Nöie bringt o är Höchschtleischtige

50 Tonne Stei u Sang, 3600 Ziegusteine

Bim Nöibou heimer d Glägeheit am Schopf packt – jetz oder nie.
Mit em Pitec-Bärnu isches uf Houzofä tour de Suisse gange, im Graubünde simer de fündig worde u hei gwüsst, dä wird’s.

50 Tonne Stei u Sang, 3600 Ziegusteine u jede isch acht Minute im Wasser gläge. So hei Vatter und Sohn vom Familieungernäme Heuft GmbH üse Ofä Schtei für Schtei ufboue. Bell isch e härzige Ort ir öschtliche Vulkaneifel (Bundesland Rheinland-Pfalz) in Döitscheland, dä giut sit jahrhundert us traditionells Bachofebuuredorf. Dr dörtig Bodeschatz, Beller Touff lieferet sit eh und je dr Rohstoff für au die Öfä.

«I ha geng so ä Houzofä wöue - gfüürlet & grillet hani scho immer gärn»

Daniel Burkhard, Beck us Lideschaft

Mir hei däm Ofä mou gäbig müesse iheize u när simer de enang chli nächer cho. Am beschte geits mit Naduhouz, das git e schneui Wermi u brönnt gäbig, so chame hurtig wider hingenache gä.
Buechehouz zum Bispiu git e langi Wermi, mir aber, bruche schneui Wermi.

Über sächs Wuche lang dür u dür, u jede Tag mit chli meh Temperatur, u de geng guet ufpasse dases ke Risse git, drum süüüferli. So si mir üsem Ziu immer nöcher cho.

Dr Houzofä, het wenner “chaut” isch, immer öppe 150° drunger chömemer nid, usser, mir tüe 4 Wuche nid ifüüre, aber no denn hät är mindeschtes 40°.

 

Us Beck berchunsch eifach Pipi id Ouge wenn dä Ofe plötzlich vor dir steit. Eifach gigantisch u dä Schlingu gseht de no guet us!!

60 bis 75 Tonne Houz im Jahr

Üses Houz chunnt us Lobsige auso regionaler u schwizerischer geits fasch nüm. We mir jetz 1.5 bis 2 Mou täglich tüe ifüüre, de bruche mir im Jahr zwüsche 120 bis 150 Stere Houz, u daas si übere Dume grächnet öppe 60 bis 75 Tonne Houz im Jahr – ä ungloublechi Mängi.

Dr Reiz u d Useforderig a dä Ofä si – ne z verstah, z lehre, z läbe u ä chline Houzofäflüschterer z wärde.

Für es aständigs Houzofäbrot muess me öpe zwe Stung iifüüre, so berchöme mir e Chärntemperatur vo 250°. Z guete Ghör seit üs ob witer muess iigfüüret wärde oder nid, wenns knischteret de isch guet wenns plumpset muess me wider chli Schüü gä, de isch nämmlich z Räschthouz i Chessu gheit.

Z Nass-Dampfe ungerstützt z Ufbräche ade vorgsene Schnittschteuä u verhinderet dases eifach nöime ufplatzt, das, wei mir natürlich nid. Cheuti, Räge, Näbu u z Houz hei grosse Ifluss ufs Verhaute vom Ofä u schlussändläch de ou ufs Bachergäbnis.

«Es isch auso nid eifach Bache, sondern e Läbesischtellig und es Gfüeu.»

Jetz wird gäbig igschosse, öppe achzg Brot ufs mou möge i Houzofä. Igschosse wird immer i zwe Etappe, z hingere Brot berchunnt chli Vorschprung, wöu hinge im Ofe nid di glichi Temperatur isch wie vorne, nach emne Momänt chunnt de dr Räschte dri.

Nach eire Stung wird de das Brot drückt, aglängt und villich o chli klopfet, ä guete Beckermeischter merkt sofort ob z Brot fertig isch oder nid.

Je nach däm, was de nach däm Brot i Ofä söu, müesst me de wider chli iifüüre oder de haut lo abchaute. Üser HouzofeChnöpf bruche ja nid so viu Hitz wie es Brot. Idealerwies tuet me dr Tag so Plane, dass me ir Nacht richtig vougas git u je später dr Tag desto weniger Hitz zum Houzofebache.

Das isch d Gschicht vo üsem wunderschöne u hitzige Houzofä – jede Tag ufs Nöie bringt o är Höchschtleischtige